NAKASUD sa sa Philippine area of responsibility ang bagyong Queenie nga adunay kategoryang Typhoon kagabii, apan wa kini direktang epekto sa Central Visayas.

Bisan kon kusog ang pag-uwan sukad pa lang kagahapon sa buntag hangtod sa hapon ang nasinati sa Metro Cebu.

Gani pagka-hapon dungan sa kusog nga pag-ulan ang kusog nga pagpangilat ug pagpanugdog sa ubang bahin sa Cebu, ilabi na sa dakbayan sa Sugbo. Ang uwan mimugna og mga baha sa pipila ka mga karsada.

Gitug-an ni Engr. Oscar Tabada,pangu sa Phiilippine Atmospheric Geophysical Astronomical Services Administration (Pagasa) PAGASA Visayas, nga ang ulan sugod sa alas 10:30 sa buntag hangtod sa alas 3:29 sa hapon.

Ang Pagasa Mactan mitala og 51.4 mm nga rainfall measurement nga makamugna na og mga pagbaha.

Apan ang maong bati nga panahon nga nasinati kagahapon, pasabot ni Tabada,way labot ang bagyong Queenie, nga adunay international name nga ‘Kong-Rey kay dala kini sa localized thunderstorm.

Alas 4 kagahapon sa hapon, matod ni Jhomer Eclarino, weather specialist sa Pagasa Mactan, ang typhoon Queenie, ang adunay 160 kilometro matag oras nga gikusgon sa hangin ug pag-unos nga 195 kilometro matag takna, posible pa nga mokusog samtang anaa pa sa kadagatan. Dugang ni Eclarino nga sa pagkakaron gamay pa ang kahigayunan nga maka-landfall ang maong bagyo.

Bisan way direktang epekto sa ubang bahin sa Visayas, gawas lang sa Eastern Visayas, nipasidaan gihapon ang Pagasa sa publiko ug mga lokal nga kagamhanan nga di mokompyansa, tungod sa mga masinati gihapong kusog nga pag-ulan tungod sa localized thunderstorm. 

Tweet